Çin Mərkəzi Bankı rəqəmsal valyuta sahəsində innovasiyanı təşviq etmək məqsədilə əlavə operatorları elan edib.
Cashless.az xəbər verir ki, tənzimləyici orqan rəqəmsal yuan (e-CNY) əməliyyatları üçün səlahiyyətli institutlar siyahısına 12 bankı əlavə edib.
Bu addımın məqsədi rəqəmsal valyutanın davamlı inkişafını təşviq etmək, xidmətlərin inklüzivliyini artırmaq və vətəndaşların təhlükəsiz, rahat və səmərəli rəqəmsal yuan xidmətlərinə olan tələbatını qarşılamaqdır. Yeni əlavə olunan operatorlar arasında Çin CITIC Bankı, Çin Everbright Bankı və Huaxia Bank da yer alır və onlar Mərkəzi Bankın rəqəmsal yuan sistemi ilə əlaqələndiriləcək.
Məlumata əsasən banklar əməliyyat və texniki hazırlıqları tamamladıqdan sonra rəqəmsal yuan xidmətlərini təqdim etməyə başlayacaqlar.
Mərkəzi Bank bildirib ki, operatorların sayını artırmağa davam edəcək.