ABŞ-də buraxılan “Visa”, “Mastercard”, “American Express” və “Discover” kartlarının ödəniş həcmi 2025-ci ildə 2024-cü ilə nisbətən 6,4% artaraq 11,46 trilyon dollara çatıb.
Cashless.az xəbər verir ki, “Nilson Report”un nəşr etdiyi sənədlərə görə bu artımda rəqəmsal həllərin rolu böyük olub.
Təkcə ABŞ-də buraxılan kredit kartlarının həcmi isə 6,1% artaraq 6,51 trilyon dollar olub. Ümumilikdə, “Visa”, həm kredit, həm də debet kart seqmentində ən böyük bazar payına sahibdir.
Araşdırmaya əsasən rəqəmsal rəqiblər, məsələn “PayPal”, “Cash App”, “Stripe” və “Block”un “Square” xidməti təklif etsələr də, müştərilər tez-tez hələ də ənənəvi kredit və debet kartlarından istifadə edirlər. Yeni rəqəmsal platformalar kiçik bizneslərin ödənişləri qəbul etməsini asanlaşdıraraq bazarı genişləndirirlər.
“Nilson Report”un məlumatına görə, “Visa” ötən il bazarda lider olub. Belə ki, ABŞ-də debet əməliyyatlarının 31%-ni, kredit əməliyyatlarının isə 30%-ni idarə edib. “Mastercard” isə ikinci yerdədir, kredit kartlarında 14%, debet kartlarında isə 12% bazar payı var.