Moonshot Aİ şirkəti tərəfindən yaradılmış qabaqcıl süni intellekt modeli olan Kimi və Çinin dövlət banklarından biri birlikdə süni intellekt əsaslı kredit kartı təqdim edib.
Cashless.az xəbər verir ki, yeni kartda süni intellekt ayrıca köməkçi servis kimi deyil, kartın əsas idarəetmə aləti kimi istifadə olunur.
Kart sahibləri əməliyyat tarixçəsini, xərclərini və ödəniş planlarını ənənəvi menyular üzərindən deyil, Kimi-yə yazdıqları sadə sorğularla idarə edə biləcəklər. Məsələn, istifadəçi aylıq xərclərini kateqoriyalar üzrə müqayisə edə və ya borc üzrə daha sərfəli ödəniş qrafiki formalaşdıra biləcək.
Kimi kart sahiblərinin böyük həcmdə maliyyə tarixçəsini emal etməyə və real vaxt rejimində cavab verməyə imkan verir. Onun hətta satış nöqtəsində ödəniş zamanı da istifadə oluna biləcəyi bildirilir.
Dövlət bankının layihədə iştirakı isə Çinin “Aİ Plus” strategiyası ilə əlaqələndirilir. Bu strategiya süni intellektin ənənəvi sahələrə, o cümlədən bank sektoruna inteqrasiyasını nəzərdə tutur. Bununla yanaşı, kartın süni intellekt modeli ilə işləməsi məlumat məxfiliyi ilə bağlı suallar yaradır. Çünki belə məhsullarda süni intellekt istifadəçinin əməliyyat tarixçəsinə və xərcləmə davranışına daha geniş çıxış əldə edir.