“Buy now, pay later” (BNPL – indi al, sonra ödə) xidmətləri təqdim edən İsveç şirkəti Klarna qlobal tərəfdaş şəbəkəsinin 1 milyon mağazanı keçdiyini açıqlayıb.
Şirkətin məlumatına görə, son bir ildə Klarna ödəniş üsullarını təklif edən ticarət tərəfdaşlarının sayı 47% artıb. Təkcə 2025-ci ildə platformaya 285 min yeni mağaza qoşulub, onların 115 mindən çoxu son rübdə əlavə edilib.
Klarna bildirir ki, bu artım ödəniş xidmətləri provayderləri ilə əməkdaşlığın genişlənməsi hesabına baş verir.
Şirkət nümayəndəsi David Sykes-in sözlərinə görə, Klarna gündəlik xərclərdə daha geniş istifadə olunur və istifadəçilərin maliyyə idarəçiliyində daha aktiv rol oynayır.
Ən sürətli artım isə istirahət, idman və hobbi kateqoriyasında qeydə alınıb – bu seqmentdə tərəfdaşların sayı illik müqayisədə 91% artıb.
Bundan əlavə, Klarna tətbiqinin gündəlik istifadəçi sayı da son bir ildə 53% artaraq 9 milyona çatıb. Şirkət bu artımı istifadəçilərin bankçılıq, xərcləmə və alış funksiyalarından daha aktiv istifadə etməsi ilə əlaqələndirir.