“OpenAI” altı ay əvvəl istifadəyə verilmiş “Sora” adlı “TikTok”a bənzər sosial tətbiqini bağlayır.
Cashless.az xəbər verir ki, şirkət bu qərarın səbəbini açıqlamayıb və tətbiqin rəsmi olaraq nə vaxt dayandırılacağı ilə bağlı da məlumat verməyib.
“Sora” süni intellekt əsaslı “TikTok” kimi nəzərdə tutulmuşdu və istifadəçilərə tanış olan şaquli video lent (feed) interfeysini təkrarlayırdı. Lakin gözlənildiyi kimi, tətbiq bir növ “deepfake” məzmunu ilə seçildiyindən bir qədər qəribə qarşılanıb.
Mobil analitika şirkəti “Appfigures”in məlumatına görə, tətbiq noyabrda pik həddə çataraq “App Store” və “Google Play” platformalarında ümumilikdə təxminən 3,3 milyon yükləmə əldə edib. Lakin artım davam etməyib və fevralda yükləmələr 1,1 milyona qədər azalıb.
Bu rəqəm böyük görünsə də, müqayisə üçün qeyd edək ki, “OpenAI”ın digər məhsulu olan “ChatGPT” həftəlik 900 milyon aktiv istifadəçiyə malikdir.
Ümumilikdə isə “Appfigures” hesab edir ki, “Sora” fəaliyyət göstərdiyi müddətdə tətbiqdaxili alışlar vasitəsilə təxminən 2,1 milyon dollar gəlir əldə edib.