“PayPal Holdings” populyar “P2P” (peer-to-peer) ödəniş tətbiqi “Venmo”nu ilk dəfə ABŞ-dən kənarda 90 ölkədə istifadəyə verib.
Cashless.az xəbər verir ki, bu barədə şirkət bazar ertəsi açıqlama yayıb.
Şirkətin məlumatına görə, “Venmo” artıq “PayPal” hesabları ilə inteqrasiya olunub və istifadəçilər, həm yerli, həm də beynəlxalq pul köçürmələrini telefon nömrəsi vasitəsilə həyata keçirə biləcəklər. Həmçinin, “Venmo” 24 avqusta qədər beynəlxalq əməliyyat haqlarını ləğv edib.
“Venmo” nümayəndəsi bildirib ki, “PayPal” ilə bu inteqrasiya “Venmo”nun istifadə imkanlarını genişləndirmək və müştərilər üçün daha çox dəyər yaratmaq baxımından növbəti uğurlu addımdır.”
“PayPal” “Venmo”nu 2013-cü ildə “Braintree Payments Solutions” şirkətini 800 milyon dollara satın alaraq əldə edib. Bundan əvvəl, 2012-ci ildə Çikaqoda yerləşən “Braintree” “Venmo”nu 26,2 milyon dollara almışdı.
Yeni CEO Enrique Lores-in rəhbərliyi altında bu addım “Venmo”nun beynəlxalq miqyasda istifadəsini artırmaq məqsədi daşıyır. “PayPal” hazırda təxminən 200 ölkədə və 25 valyutada fəaliyyət göstərir.
Yeni inteqrasiya ilə “Venmo” və “PayPal” istifadəçiləri bir-birilərinə sərhədsiz və rahat ödəniş edə biləcəklər. Pul köçürmələrində istifadəçilərə valyuta dəyişmə xərcləri və tətbiq olunan haqlar barədə ətraflı məlumat verilir.
Şirkət bildirib ki, bu addım P2P ödənişlərdə yaranan çətinlikləri aradan qaldıracaq və beynəlxalq pul göndərişlərini daha sadə, sürətli və ucuz edəcək.