2025-ci ildə dünyada fırıldaqçılıq və dələduzluqdan itkilər 9,2% artıb. Bu artımın böyük hissəsi isə süni intellektdən istifadə edən fırıldaqçıların fəaliyyəti ilə izah olunur.
Cashless.az xəbər verir ki, bu barədə “Nasdaq”ın “Verafin” proqram təminatı bölməsinin hesabatında bildirilib.
Hesabata görə 2025-ci ildə bank fırıldaqçılığı və dələduzluqdan 579,4 milyard dollar itki qeydə alınıb. Bu da 2023-cü illə müqayisədə 53,3 milyard dollar çoxdur.
“Verafin” bölməsinin 2026-cı il Qlobal Maliyyə Cinayətləri Hesabatına görə isə itkilərin 62 milyard dolları dələduzluq və saxtakarlıqla bağlı olub. Bu kateqoriyada artım 19,3%-dir. Bankların özü isə 517,4 milyard dollar itki görüb, bu da 2023-cü illə müqayisədə 8,2% çoxdur.
Süni intellektin fırıldaqçılıqda rolu böyükdür. “Verafin”in fırıldaqçılıq məhsulu strategiyasının rəhbəri Colin Parsons bildirib ki, “Süni intellekt (Sİ) gündəlik fırıldaqçılıq fəaliyyətlərinin hər yerində istifadə olunur”. Hesabata görə Sİ dəstəkli kiber fırıldaqçılıq 14,3 milyard dollar itkiyə səbəb olub, bu da son iki ildə 19,6% artım deməkdir. Sorğuya qatılan maliyyə təhlükəsizliyi mütəxəssislərinin 90%-i son iki ildə Sİ ilə əlaqəli hücumların artdığını görüb.
Parsons əlavə edib ki, “klassik saxta e-poçt göstəriciləri, yazı səhvləri artıq yoxdur. Fırıldaqçılar Sİ vasitəsilə qurbanlarla danışıq ssenarilərini idarə edir və getdikcə daha da təkmilləşirlər”.
Hesabatın ümumi nəticələrinə görə, süni intellekt həm cinayətkarların əlində güclü bir silah, həm də maliyyə institutlarının ən effektiv müdafiə vasitəsi kimi çıxış edə bilər. Hesabatda qeyd olunur ki, maliyyə qurumlarının 75%-dən çoxu yaxın gələcəkdə Sİ-yə yatırımları artırmağı planlaşdırır. Bu, fırıldaqçılıqla mübarizədə texnoloji üstünlüyü əldə etmək və cinayətkarların yeniliklərinə qarşı daha sürətli reaksiya vermək məqsədi daşıyır.