1 aprel 2026-cı il tarixindən etibarən Uzum Nasiya platformasının operatoru Uzum Fintech Hub şirkəti olacaq. Mövcud müqavilələr üzrə hüquqların ötürülməsi avtomatik qaydada həyata keçiriləcək.
Xidmət tərəfindən verilən məlumata görə, istifadəçilər üçün xidmət şərtlərində heç bir dəyişiklik nəzərdə tutulmur. Müştərilərin kredit limitləri, ödəniş tarixçəsi və şəxsi məlumatları qorunub saxlanılacaq. Mobil tətbiq və platformanın digər xidmətləri də fasiləsiz fəaliyyətini davam etdirəcək.
Yeni müqavilə bağlayan istifadəçilərdən isə yeni operatorla bağlı yenilənmiş ofertanı qəbul etmək tələb olunacaq.
Ödənişlərin emalı əvvəlki kimi lisenziyalı ödəniş təşkilatı olan Solutions Lab vasitəsilə həyata keçirilməsi nəzərdə tutulur.
Şirkətdən bildirilib ki, operator dəyişikliyi texniki xarakter daşıyır və istifadəçilər üçün mövcud şərtlərə təsir göstərmir.
Qeyd edək ki, Uzum Nasiya “indi al, sonra ödə” (Buy Now, Pay Later – BNPL) modeli üzrə fəaliyyət göstərən maliyyə xidmətidir. Platforma istifadəçilərə məhsul və xidmətləri dərhal əldə edib ödənişi müəyyən müddət ərzində hissə-hissə həyata keçirməyə imkan verir.