Visa tərəfindən aparılan “Maliyyə xidmətləri araşdırması” Türkiyədə ödəniş vərdişlərinin sürətlə dəyişdiyini və rəqəmsal həllərin gündəlik həyatın ayrılmaz hissəsinə çevrildiyini göstərir. Araşdırmaya görə, mobil ödənişlər, rəqəmsal bankçılıq, açıq bankçılıq və blokçeyn texnologiyaları ödəniş təcrübəsinin əsas istiqamətlərinə çevrilir.
İstifadəçilər artıq maliyyə xidmətlərini yalnız bir kanal üzərindən deyil, ehtiyac, vərdiş və təhlükəsizlik gözləntilərinə uyğun şəkildə birlikdə dəyərləndirirlər. Yaş qrupları arasında isə həm istifadə edilən həllər, həm də bu xidmətlərdən gözlənilən fayda fərqlənir. Gənclər sürət və rahatlığa üstünlük verir, orta və daha yuxarı yaş qrupları üçün isə təhlükəsizlik və vərdişlər daha önəmlidir.
Əsas nəticələr
1. Mobil təmassız ödənişlər geniş yayılır
Mobil təmassız və QR kodla ödənişlər bütün yaş qruplarında artmaqdadır. Xüsusilə növbə olan məkanlarda marketlərdə, mağazalarda, kafe və restoranlarda, apteklərdə və yanacaqdoldurma məntəqələrində daha çox istifadə olunur. Android əsaslı mobil təmassız ödənişlərdə istifadə səviyyəsi təxminən 70%-ə çatır.
2. Rəqəmsal bankçılıq üzrə məlumatlılıq 98%
Rəqəmsal bankçılıq bütün yaş qruplarında demək olar ki, hamı tərəfindən tanınır. İstifadəyə təsir edən əsas faktorlar isə fərdi ehtiyaclara görə dəyişir. Pulsuz xidmətlər əsas motivasiya hesab olunur. İstifadəçilər mobil bank tətbiqlərinə həftədə orta hesabla 5 dəfə daxil olur. 35–55 yaş qrupunda isə təhlükəsizlik amili daha ön plandadır.
3. Açıq bankçılıq yüksək potensiala malikdir
Sorğuda iştirak edənlərin yarıdan çoxu açıq bankçılıq anlayışı ilə tanış deyil. Bununla belə, istifadəçilərin 56%-i gəlir-xərc izləmə imkanını, 43%-i isə bütün kart məlumatlarının bir platformada görünməsini istəyir.
4. Kriptovalyutalara maraq yüksək, istifadə ehtiyatlıdır
Kriptovalyutalar üzrə məlumatlılıq 95%-dən çoxdur, lakin istifadə daha ehtiyatlıdır. İştirakçıların yalnız 49%-i indiyədək kripto əməliyyatı etdiyini bildirib. Son bir ayda aktiv istifadə edənlər isə ümumi kütlənin 20%-ni təşkil edir. Ən aktiv qrup 25–44 yaş aralığıdır.
5. Fiziki bank filiallarına ehtiyac azalır
Araşdırmaya görə, istifadəçilərin yarısı bankın fiziki filialını artıq vacib hesab etmir. Bununla belə, 47% respondent üçün filial hələ də önəmlidir. Bu isə rəqəmsallaşmaya baxmayaraq, bəzi istifadəçilər üçün etibar və canlı ünsiyyətin əhəmiyyətini qoruduğunu göstərir.
Ümumilikdə, araşdırma göstərir ki, maliyyə xidmətləri artıq təkkanallı deyil, istifadəçinin ehtiyacına uyğun formalaşan çoxqatlı bir sistemə çevrilir.