"T-Bank" və "Sberbank" QR-kodla pul köçürmələrini işə salır

“T-Bank” və “Sberbank” Rusiyada fiziki şəxslər arasında QR-kod vasitəsilə banklararası pul köçürmələri xidmətini istifadəyə verməyə hazırlaşır. Xidmətin yaxın günlərdə işə düşəcəyi gözlənilir. Bildirilir ki, köçürmələr ənənəvi Sürətli Ödənişlər Sistemi və Milli Ödəniş Kartları Sistemi olmadan həyata keçiriləcək.

Yeni mexanizmə əsasən, vəsaiti qəbul edən şəxs mobil bank tətbiqində QR-kod və ya keçid yaradır. Pul göndərən şəxs isə QR-kodu skan edərək və ya göndərilən keçid vasitəsilə məbləği birbaşa alıcının hesabına köçürür. Alternativ olaraq, alıcı QR-kod əvəzinə hiperlink də yarada bilər. Bu keçidi e-poçt, SMS və ya mesajlaşma tətbiqləri ilə paylaşmaq mümkündür ki, bu da prosesi daha rahat və çevik edir. “T-Bank”ın məlumatına görə, bu texnologiya xüsusilə müxtəlif bankların müştərilərindən eyni vaxtda vəsait toplanması tələb olunan hallarda köçürmələri sürətləndirəcək.