Honq Konqda bank əmanətləri üçün yeni “Money safe” sistemi istifadəyə verildi

Honq Konqun rəqəmsal bankları da daxil olmaqla bütün pərakəndə bankları “Money Safe” adlı yeni əmanət qoruma sistemini istifadəyə verib. Bu xidmət müştərilərin əməliyyatlarını fırıldaqçılıq risklərindən qorumaq məqsədi daşıyır və bank sektoru üzrə koordinasiyalı şəkildə tətbiq olunub.
Yeni sistemin əsas xüsusiyyəti onun praktik işləmə mexanizmində özünü göstərir. Belə ki, “Money Safe” sistemi vasitəsilə müştərilər əmanətlərinin bir hissəsini əlavə qoruma altına ala bilirlər. Bu vəsait “safe” statusu alır və əlavə yoxlamalar aparılmadan sərbəst şəkildə köçürülə və ya nağdlaşdırıla bilməz. Pulun çıxarılması zamanı banklar müştəri ilə üzbəüz anti-fırıldaq yoxlaması aparır ki, bu da müştərilərə əməliyyatlarını yenidən qiymətləndirmək və mümkün fırıldaqçılıq hallarını müəyyən etmək imkanı yaradır.

Honq Konq Pul İdarəsi (HKMA) və Honq Konq Banklar Assosiasiyası (HKAB) bildirir ki, “Money Safe” xidməti bütün müştəri kateqoriyaları üçün əlçatandır. Xüsusilə yaxın müddətdə istifadə olunması planlaşdırılmayan əmanətlər üçün bu sistemdən yararlanmaq tövsiyə edilir. Məqsəd fırıldaqçıların tez-tez istifadə etdiyi davranış modellərini məhdudlaşdırmaq və müştərilərin maliyyə itkilərinin qarşısını almaqdır. Sistemin effektivliyinin artırılması üçün maarifləndirmə və təhsil kampaniyaları da həyata keçiriləcək.