"Visa" və "AKAMAİ" "Agentli ticarəti" təhlükəsiz etmək üçün əməkdaşlığa başlayıb
"Visa", bulud texnologiyaları və kibertəhlükəsizlik sahəsində ixtisaslaşan “Akamai Technologies” ilə strateji əməkdaşlığa başlayıb. Tərəfdaşlıq, istifadəçilər adından məhsulları axtaran, müqayisə edən və alan avtonom süni intellekt agentlərinin iştirak etdiyi yeni “agentli ticarət” sahəsini təhlükəsizləşdirməyə yönəlib.
Əməkdaşlığın məqsədi onlayn satıcıların qarşılaşdığı əsas problemlərdən biri olan etibarlı süni intellekt agentləri ilə zərərli botları ayırd etməyi həll etməkdir. Belə ki, “Visa”nın “Trusted Agent Protocol” texnologiyası “Akamai”nin davranış analitikası və təhlükəsizlik sistemləri ilə inteqrasiya olunaraq, süni intellekt agentlərinin kimliyinin təsdiqlənməsini və onların təhlükəsiz istifadəsini təmin edəcək.
“Visa”nın baş məhsul və strategiya direktoru Cek Forestel bildirib ki, bu əməkdaşlıq satıcılara süni intellekt əsaslı təcrübələri əlavə risk olmadan dəstəkləmək imkanı verəcək.
“Akamai”nin 2025-ci il üzrə rəqəmsal fırıldaq və sui-istifadə hesabatına görə, süni intellekt bot trafiki bir il ərzində 300% artıb. Cəmi iki ay ərzində onlayn ticarət sektorunda 25 milyarddan çox süni intellekt bot sorğusu qeydə alınıb. Mütəxəssislər xəbərdarlıq edir ki, bu cür trafikin arxasındakı məqsədi və şəxsiyyəti müəyyən etmək mümkün olmadıqda, satıcılar həm real müştəriləri itirə, həm də fırıldaq riskləri ilə üzləşə bilər.
